Ompung Raja Dalian Natolu
Ompung raja mula mula
Natolu suhu natolu harajaon
Nasian langit na pitu tindi
Sian ombun napitu lapis
Sahata saoloan hamu dohot Debata Mula Jadi Nabolon
Debata mula mula
Napande manuturi na malo mangajari
Ompung holan na patupahon do ahu
Marhite tonggotonggo ku.
Ale Ompung Mula jadi Nabolon
Manatap manonggor, mananginangi, marbinege
Jala marpanarihon ma Hamu ompung dina hasusahanku
Napogos do ahu diparadongan
Napogos do ahu diparbinotoan
Napogos do hami dihajolmaon dohot di uduran
Ro ma hamu da Ompung habonaran na dao
na toga mandongani ahu
Habonaran na jonok
Na oja mandongani sude hami tinompam.
Hehe ma hamu da Ompung natolu
Natolu suhu na opat harajaon
Hehe ma hamu dibagasan rimas muna
Pagari, jala urupi hami disitaonon dhot
Sian sude musu musu nami
Na laho manoro hosa na
Gotap di tonga dalan ma sude tahi ni parjahat
Sursur sumurut ma hamu sude na mangulahon naso denggan.
Ale Ompung Mula Jadi Nabolon
Hodo namanjadihon ahu dohot sude portibion
Marhite hite Ho do ahu martonggo dibagasan hamalimon
Sulu sulu ma on di ari na holom
Tugo ditongan dalan
Tungkot di dalan na landit
Tula tula dijolo natau panorangan
Halal hilil, mana pasiding
Sursur sumurutma sude tahi ni parjahat
“Ale Ompung Mulajadi Na Bolon. Mulani nasa na adong. Na Manjadihon langit dohot aek dohot tano dohot sude nasa isina. Na So Marmulamula, Na so Marbona jala Na so binoto nang ujungna.
Dohot di hamu, Ompung Na Martua Debata na Tolu Suhu na Tolu harajaon, Na Manggonggomi langit dohot tano on dohot hami jolma manisia.
Dohot di sahala ni opung nami sijolo-jolo tubu na marsangap na martua, na manjujung hasattian sisattihon adat, patik, dohot uhum di hami pinomparna. Siparmeme, siparorot, sipanuturi raja na marsahala raja nahasaktian silehon parhorasan, silehon pasu-pasu.
Sai manatap manonggor ma hamu Oppung. Martinangi marbinege ma hamu di hatani tonggotonggokon.”
