Napinio arian pinatiur bodari
Parindahan na sukksuk
Parlompan natabo
Patio ma amang Parugas gorsi-gorsita
Asa tio hujulu tio pandapotan
Patio ma amang ogong Sijou nadao
Si patinang na hundul si urdot na mardalan
Patio ma amang Ogung Ihutan
Asa mangihut tu nauli
Tupa tu hagabean
Patio ma amang Ogung bolon
Asa boi jala marbutuha na bolon
dihurang na lobi
Patio ma Ogung oloan
Asa mangaloi di nauli
mangoloi di nadenggan
Patio ma amang ogung Doal/Ogung pandua
-Asa manduai hasangapon
Di angka nauli dohot na jagar
Patio ma amang Ogung Panggora
Asa manggora di nauli manggora di nadenggan
Manjou di nadao dohot di najonok
PINOMPARNI OP.RAJA BATAK
Patio ma amang sarune bolon
Asa patariashon hasangapon
Patariashon SAHALA NI
OMPUNGTA si RAJA BATAK
Demban sian Dairi pinang sian Angkola
Sipasinddik panaili,sipaulak hosa loja
Husonduk indahan bolon hutautan
Sintong do parjolo,sintongan do parhangkungan
Pasahata ma amang uning-uningan ta i
Nunga sahata gabe sahata horas
-Alu-aluhon ma amang hu Situan na torop
-Alu-aluhon ma amang hu saliat ni Portibion
Hu sude na mangingot poda ni Ompunta si GURU TATEABULAN
-Alu-aluhon ma amang hu pangisi ni Hutaon
dohot na dilok na timbo
-Alu-aluhon ma amang hu si RAJA HATORUSAN
na patorus tangiang pangidoan
Hu Opunta Debata Mula Jadi Nabolon
Na manjadihon tano,langit dohot nasa pangisina
-Alu-aluhon ma amang hu Ompungta RAJA UTI na Sangap i
Uti so haliapan,Uti so habubukan
Mula ni Uti-Utian,mula ni parbinotoan
nauli dohot nadenggan
Alu-aluhon ma amang hu Raja na Sakti
namangusungkon si ingani ha Debataon
dohot si ingani Harajaon
-Alu-aluhon ma amang hu Ompunta Debata Mula Jadi Nabolon
na manjadihon tanao langit dohot nasa pangisina
-O……amang Pargual Pargonsi
Na patotahon uhum dohot asi-asi
Asa marmula Gondang ma ho
Asa marmula nauli,marmula di na denggan
Nga marmula gondang ho amang
Marmula di na uli mar mula di na denggan
Di pinompar op Guru TateaBulan.,
Horas..horas..horas
 |
| Gambar Ilustrasi |